ពិធីបេីកយុទ្ធនាការ​ "គ្រួសាររឹងមាំ"​ ដេីម្បីបញ្ចប់អំពេីហឹង្សាបញ្ចលេីកុមារ​ និងការបំបែកកុមារចេញពីគ្រួសារដោយមិនចាំបាច់​ នៅកម្ពុជា​

ភ្នំពេញ៖ ព្រឹកថ្ងៃពុធ​ ទី១៩​ ខែកុម្ភ:​ ឆ្នាំ២០២០ ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជេីញជាអធិបតី​ ក្នុងពិធីបេីកយុទ្ធនាការ​ "គ្រួសាររឹងមាំ"​ ដេីម្បីបញ្ចប់អំពេីហឹង្សាបញ្ចលេីកុមារ​ និងការបំបែកកុមារចេញពីគ្រួសារដោយមិនចាំបាច់​ នៅកម្ពុជា​ ពិធីនេះរៀបចំឡេីងនៅសណ្ឋាគារកាំបូឌីយ៉ាណា៕

ស្ថិតក្នុងឱកាសដ៏មានអត្ថន័យនេះ ឯកឩត្តម រដ្ឋមន្រ្តី វង សូត បានមានប្រសាសន៍ថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់ចំពោះការលើកកម្ពស់ អនុវត្តអនុសញ្ញាស្តីពីសិទ្ធិកុមារ និងច្បាប់អន្តរជាតិពាក់ព័ន្ធនានា ដើម្បីឆ្លើយតប ទៅនឹងតម្រូវការរបស់កុមារ និងកិច្ចការពារជាពិសេសសម្រាប់កុមារ ដើម្បីអាចឲ្យកុមាររស់នៅក្នុងសេរីភាព សន្តិភាព និងការអភិវឌ្ឍ តាមរយៈការដាក់ចេញវិធានការជាច្រើនរួមមាន ការរៀបចំច្បាប់ គោលនយោបាយ ផែនការយុទ្ធសាស្រ្ត និងលិខិតបទដ្ឋាននានាជាច្រើនដើម្បីធានាដល់កិច្ចការការពារកុមារ ឲ្យកាន់តែប្រសើរឡើង។

អំពើហិង្សាលើកុមារ គឺជាបញ្ហាសាកល ដែលបង្កផលវិបាកយ៉ាងធ្ងន់ធ្ងរ ស្ទើពេញមួយជីវិតដល់សង្គមជាតិ។ អំពើហិង្សាលើកុមារ គឺជាសកម្មភាពដែល មិនអាចអត់ឱនឲ្យបាន ទោះនៅក្នុងរូបភាពណាក៏ដោយ ព្រោះថា អំពើហិង្សាធ្វើឲ្យប៉ះពាល់ដល់ការអភិវឌ្ឍរបស់កុមារ សីលធម៌សង្គម សេចក្តីថ្លៃថ្នូរ និងការអភិវឌ្ឍធនធានមនុស្សនាពេលអនាគត។ បន្ថែមពីលើនេះ ថ្នាក់ដឹកនាំរបស់រាជរដ្ឋាភិបាលកម្ពុជា តែងតែចំណាយពេលវេលាចុះសួរសុខទុក្ខកុមារកំព្រា ក្រីក្រ និងពិការ នៅតាមមណ្ឌលថែទាំជាប្រចាំផងដែរ។

ក្រសួងគ្រោងដាក់ឲ្យដំណើរការសាងសង់មជ្ឈមណ្ឌលស្តារយុវនីតិសម្បទា នាថ្ងៃទី២០ ខែកុម្ភៈ ឆ្នាំ២០២០ សំដៅធានាការពារសិទ្ធិ និងឧត្តមប្រយោជន៍ របស់អនីតិជន ដែលប្រព្រឹត្តបទល្មើស ដើម្បីទទួលបានការអប់រំ បណ្តុះបណ្តាល និងស្តារនីតិសម្បទា មុននឹងធ្វើសមាងរណកម្ម ទៅក្នុងសហគមន៍ និងគ្រួសារវិញ ស្រប់តាមច្បាប់ស្តីពី យុត្តិធម៌អនីតិជន។ ជាពិសេសគឺដើម្បីជួយចែករំលែកបន្ទុករបស់ពន្ធនាគារ និងចែកឲ្យដាច់ពីគ្នារវាងមនុស្សពេញវ័យ និងអនីតិជន ដែលបាននិងកំពុងរស់នៅលាយឡំជាមួយមនុស្សពេញវ័យ នៅក្នុងពន្ធនាគារ។

យុទ្ធនាការ «Cambodia Protect» ដែលផ្តួចផ្តើមសហការរៀបចំ ដោយអង្គការយូនីសេហ្វ គឺជាយុទ្ធសាស្រ្ត ប្រាស្រ័យទាក់ទងលើកកម្ពស់ការយល់ដឹង ដើម្បីលុបបំបាត់អំពើហិង្សាលើកុមារ និងទប់ស្កាត់ការបំបែកកុមារចេញពីគ្រួសារ ដោយមិនចាំបាច់ ដោយធានាថា គ្រួសារគឺជាទីកន្លែងទីមួយ ដែលមានបរិយាកាសប្រកបដោយសុវត្ថិភាព ដ៏ល្អប្រសើរបំផុតសម្រាប់ការលូតលាស់ និងអភិវឌ្ឍន៍កុមារ ដែលជាសកម្មភាពមួយនៃយុទ្ធសាស្រ្ត «គ្រួសាររឹងមាំ» ដើម្បីបញ្ចប់អំពើហិង្សាលើកុមារ និងការបំបែកកុមារចេញពីគ្រួសារដោយមិនចាំបាច់ នៅកម្ពុជា។

ជាមួយគ្នានេះ លោកជំទាវ ខៀវ បូរី រដ្ឋលេខាធិការនៃក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា យុទ្ធសាស្រ្ត «គ្រួសាររឹងមាំ» ផ្សព្វផ្សាយតាមវិធីសាស្រ្តចម្រុះជាច្រើនដូចជា ផលិតជារូបសញ្ញាយុទ្ធនាការ អាវយឺត មួក ផ្ទាំងបដារូបភាព ប៉ានណូ រឿងខ្លីផ្សាយតាមទូរទស្សន៍ និងវិទ្យុ ផ្សព្វផ្សាយសារអប់រំ តាមប្រព័ន្ធបច្ចេកវិទ្យា ព័ត៌មានវិទ្យា តាមសហគមន៍ និងការស្វែងរកមតិគាំទ្រ ជាដើម។ ព្រឹត្តិការណ៍នេះ ជាការបោះជំហានទៅមុខដ៏វិជ្ជមានមួយ នៅក្នុងកិច្ចខិតខំប្រឹងប្រែង របស់ប្រទេសកម្ពុជា ដើម្បីបញ្ចប់អំពើហិង្សាលើកុមារ គ្រប់រូបភាព និងការបំបែកកុមារចេញពីគ្រួសារ ដោយមិនចាំបាច់នៅកម្ពុជា៕

Caption

Caption

ថ្ងៃ ព្រហស្បតី៏ ទី ២០ ខែ កុម្ភ ឆ្នាំ ២០២០ អត្ថបទ និងរូបភាពដោយ Than bunhen