អង្គការ Yume School ( School Aid Japan ) បានសន្យាថា នឹងពិនិត្យលទ្ធភាពជួយសាងសង់ អគារសិក្សាមួយខ្នង នៅសាលាបឋមសិក្សាតាសួស

ថ្ងៃពុធ ៨រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែកុម្ភ: ឆ្នាំ២០១៩ ឯកឧត្តម វង សូត ​​រដ្ឋមន្ត្រីក្រសួងសង្គមកិច្ច ​​​អតីតយុទ្ធជន និងយុវនីតិសម្បទា​ និងលោកជំទាវ និងគណៈប្រតិភូអង្គការ Yume School ( School Aid Japan ) អញ្ជេីញចុះពិនិត្យទីតាំងសម្រាប់សាងសង់អគារសិក្សា ២កន្លែង វត្តក្បាលដំរី ឃុំត្រពាំងថ្លុង ស្រុកពញាក្រែក ខេត្តត្បូងឃ្មុំ និងឃុំតាស្រស់ ស្រុករមាសហែក ខេត្តស្វាយរៀង។

ដំណាងអង្គការ Yume School ( School Aid Japan ) បានសន្យាថា នឹងពិនិត្យលទ្ធភាពជួយសាងសង់អគារសិក្សាមួយខ្នង នៅសាលាបឋមសិក្សាតាសួស ចំណែកនៅសាលាបឋមសិក្សាក្បាលដំរី លោកនឹងយកទៅសិក្សាជាមួយថ្នាក់លើសិន ។

ជុំវិញការចុះពិនិត្យនេះ ឯកឧត្តមរដ្ខមន្រ្តី វង សូត បានបញ្ជាក់ឲ្យដឹងថា បន្ទាប់ពីមានសំណើររបស់ប្រជាពលរដ្ឋ ពិសេសនាយកសាលាមក​សម្តេច​អគ្គមហាពញាចក្រី ហេង សំរិន​ ​បានស្នើដល់អង្គការ Yume School ឲ្យជួយសាងសង់អគារសិក្សាសម្រាប់កូនក្មួយបានរៀនសូត្រតាមតម្រូវការ ។

លោក ប៉ាង មុន្នីបញ្ញា នាយកសាលាបឋមសិក្សាតាសួស បានលើកឡើងថា សព្វថ្ងៃសាលារបស់លោកខ្វះអគារសិក្សាចំនួន៦បន្ទប់ ខណៈសិស្សសរ៉ុប ៤០៦ នាក់។ លោកថា បើអង្គការខាងលើជួយសាងសង់អគារតាមសំណើរនោះ វានឹងជួយសម្រួលដល់ក្មួយសិស្សានុសិស្សបានមួយកម្រិតធំ ព្រោះសព្វថ្ងៃពួក​គេរៀន​ក្នុងបន្ទប់ធ្វើពីដែក នៅពេលថ្ងៃក្តី រៀនមិនកើត ហេតុនេះហើយទើបសព្វថ្ងៃរៀនតែពេលព្រឹកមួយវេលប៉ុណ្ណោះ ។

លោក ជូន ស៊ីធូ នាយកសាលាបឋមសិក្សាក្បាលដំរីបានឲ្យដឹងថា សព្វថ្ងៃសាលារបស់លោកខ្វះ បន្ទប់សម្រាប់សិស្សសិក្សាចំនួន ៦បន្ទប់ មានសិស្​សចំនួន​មួយថ្នាក់បានរៀននៅខាងក្រៅ ដូចនេះបើ អង្គការ Yume School ជួយសាងសង់អគារមួយខ្នង៦បន្ទប់តាមសំណើរ គឺពិតជាល្អសម្រាប់ក្មួយៗ៕

 

ថ្ងៃ ព្រហស្បតី៏ ទី ២៨ ខែ កុម្ភ ឆ្នាំ ២០១៩ អត្ថបទ និងរូបភាពដោយ Than bunhen